Kualifikimi mundëson fitimin e njohurive, shkathtësive dhe kompetencave të nevojshme për punë të sigurt me automjete me shtytje alternative. Puna me automjetet me shtytje alternative bazohet në përdorimin e teknologjive digjitale dhe të gjelbra. Teknologjitë digjitale lidhen me përdorimin e teknologjive përkatëse për prodhimin, mirëmbajtjen, diagnostikimin dhe servisimin e automjeteve me shtytje alternative, ndërsa teknologjitë e gjelbra lidhen me komponentën ekologjike të këtyre automjeteve në krahasim me automjetet konvencionale me MDJ (motor me djegie të brendshme).
Me këtë kualifikim formohen kuadro që do të kryejnë punë operative të lidhura me organizimin e procesit të prodhimit gjatë montimit të pjesëve të automjeteve me shtytje alternative, si dhe me kontrollin e cilësisë së punëve të realizuara.
Personi me këtë kualifikim është i aftësuar për organizimin e punës gjatë mirëmbajtjes së rregullt dhe diagnostikimit të automjeteve me shtytje alternative, si dhe për kontrollin, rregullimin, lidhjen, montimin dhe çmontimin e pjesëve, pajisjeve dhe sistemeve të këtyre automjeteve. Tekniku për automjete me shtytje alternative përdor dokumentacion teknik, udhëzime dhe manuale për realizimin cilësor të detyrave të punës. Gjithashtu, selekton dhe depoziton mbetjet në përputhje me dispozitat ligjore dhe me respektimin e rregullave të punës së sigurt. Kuadrot me këtë kualifikim respektojnë kodin dhe etikën profesionale dhe ruajnë sekretet afariste si dhe të dhënat personale.
Tekniku për automjete me shtytje alternative, pas përfundimit të arsimit të tij, do të mund të punojë si Diagnostikues i defekteve të automjeteve, montues i motorëve dhe automjeteve motorike ose Mekanik dhe montues i motorëve dhe automjeteve motorike në industrinë e prodhimit të automjeteve me shtytje alternative dhe pjesëve për këto automjete, në servise për mirëmbajtje dhe riparim të automjeteve me shtytje alternative, në autosallone, dyqane për pjesë rezervë, ndërmarrje me flotë automjetesh, ndërmarrje që kryejnë transport publik të udhëtarëve dhe mallrave, si dhe mund të zhvillojë edhe biznesin e tij/saj privat.
